Kolom

Cerite Jaman Dulu Make Bahasa Betawi

Marjuki

Dulu jaman kita kecil taun 80an …
Maen di kali saban sari, ngobak  aer kalenan bekas injekan kaki kebo.

Pada demen bangat gupak. Romannya kalu kaga digeroin kaga mao brenti.
Makannye gadoin ubi mentah dikletuk.

Puun rambutan abis digresekin. Puun jambu asal ada buahnya dikit diorag-orag. 
Sorenya men bola di bulakan.

Kaki tebowek kena beling, somplak. Udahan dua ari tibang diborehin kopi pada belarian lagi.Kaga nemu penyakit yang aneh aneh. Paling banter sakit gidu doangan. Ditabunin tiker rombeng bae udah waras.

Saban menggerib ampe isya kaga ada yang nonton tipi. Emang dasarnya pada kaga gablek. Semuaaah pada ngaji. Alip-alipan. Ngapal sipat dua puluh. 

Baba- enya’ kita punya anak belerot. Idup semua pada bisa ngaji. Pada bisa sekolah ampe tinggi. Padahal apaan kerjaaannya …Biar belangsak tapi kaga pada ngeluh tentang idup di dunia.

Dulu tumpah berkah turun dari langit. Nasehat kong aji-nyai aji, didengerin ampe nyerep ke ati. Kaga songong ama orang alim apalagi cucu nabi.

Kaga sembayang jumat sekali berasa nyesel setengah mati.

Nah ….bandingin dah ama jaman sekarang. Syareat agama disepelein.  Ulama diudag-udag kaya layangan putus. Kaga boleh dakwah.

Lah pan emang itu kerjaanya. Tapi ada orang bejad jadi ulama. Pada betingkah pala digubed-gubed ama sorban. Jadi banyak nyang ikutan bejad ngelawan syareat agama.

Penyakit aneh pada nongol. Kaga idep ngobatinnya. Kabar goroh pada sliweran. Udah susah bedain nyang bener ama nyang kaga. Orang jadi bringasan, gampang beklai. 

Kalu kata engkong-engkong kita “Berkah ude tinggal res-resannya doang”

Total Page Visits: 130 - Today Page Visits: 1

Penulis:Mar

Editor :Redaksi

Sumber :OPSI.ID